(ព្រះវិហារ )៖ ជនសង្ស័យម្នាក់បានជិះម៉ូតូរបស់ខ្លួនយ៉ាងកញ្ចាស់ធ្វើសកម្មភាពតាមដងផ្លូវពេលដែលជួបម៉ូតូណាស្អាតល្អ ជនសង្ស័យនោះបានប្ដូរម៉ូតូយកអាថ្មីទៅបាត់ ដូចករណីនេះ ជនសង្ស័យខាងលើបានធ្វើសកម្មភាព ជិះម៉តូមកដល់បានចុះកាច់សោម៉ូតូដែលប្រជាពលរដ្ឋទុក រួចចូលទៅមើលស្រែចំការត្រូវបានជនសង្ស័យនោះជិះយកទៅបាត់ តែភ្លាមៗនោះជនរងគ្រោះបានប្ដឹងទៅប៉ូលីស ហើយសមត្ថកិច្ចប៉ូលីសបានចាត់វិធានការតាមចាប់ជនសង្ស័យ រហូតបានសម្រេចនៅក្នុងចំការមួយកន្លែងដែលជនសង្ស័យបានបើកម៉ូតូគិចសមត្ថកិច្ច ដូចក្នុងរឿងកុនអញ្ចឹង។
លោកវរសេនីយ៍ឯក គង់គា នាយការិយាព្រហ្មទណ្ឌកំរិតស្រាលបានឲដឹងថា ៖ ដោយអនុវត្តតាមបទបញ្ជារបស់ លោក ឧត្តមសេនីយ៍ទោ សោះ សុខដារ៉ា ស្នងការនគរបាលខេត្តព្រះវិហារ បានដាក់បញ្ជា ត្រូវតាមចាប់ឱ្យបាននូវមុខសញ្ញាដែលធ្វើសកម្មភាពលួចម៉ូតូប្រជាពលរដ្ឋដាក់តាមដងផ្លូវ នៅព្រឹកថ្ងៃទី ១៤ ខែមិថុនា ឆ្នាំ២០២៤ ។ ជាលទ្ធផលសមត្ថកិច្ចជំនាញបានធ្វើការបង្ក្រាប ឃាត់ខ្លួនមុខសញ្ញា ចំនួន ០១ នាក់ ឈ្មោះ ជា សុខជីម ភេទប្រុស អាយុ ២៤ ឆ្នាំ មុខរបរ មិនពិតប្រាកដ រស់នៅភូមិព្រៃចាបកើត ឃុំវាលពង្ស ស្រុកឧដុង្គ ខេត្តកំពង់ស្ពឺ ដកហូតបាន ម៉ូតូ ចំនួន ០២ គ្រឿង មួកសុវត្ថិភាព ចំនួន ០១ និង ស្បែកជើង ចំនួន ០១ គូ ដែលពាក់ព័ន្ធករណីខាងលើ។
ក្រោយពីការសួរចម្លើយជនសង្ស័យរួចមកសមត្ថកិច្ចបានប្រគល់ម៉ូតូហុងដាC125 ពណ៌ខ្មៅ ស្លាកលេខ ព្រះវិហារ1E9667ជូនទៅជនរងគ្រោះវិញ។
បច្ចុប្បន្នជនសង្ស័យខាងលើ ត្រូវបានសមត្ថកិច្ចជំនាញរៀបចំសំណុំរឿងបញ្ជូនទៅសាលាដំបូងខេត្តព្រះវិហារចាត់ការបន្តតាមនិតិវិធីច្បាប់ ៕ដោយនិពន្ធនាយករងសាន
ប៊ុនស៊ី
