ចេញផ្សាយ ថ្ងៃទី 02/ធ្នូ/2023
ប្រភពពីប្រជាពលរដ្ឋ រស់នៅជាប់ខ្សែបន្ទាត់ព្រំដែន ភូមិក្អមសំណ ឃុំក្អមសំណ ស្រុកលើកដែក ខេត្តកណ្តាល បានបញ្ជាក់ឲ្យដឹងថាម្ចាស់កាស៊ីណូ ថ្មពេជ្រ កំពុងបន្តបើកឲ្យពលរដ្ឋខ្មែរ ចូលលេងល្បែងចាក់ភ្នាល់ស៊ីសងខុសច្បាប់ ច្រើនប្រភេទ យ៉ាងគគ្រឹកគគ្រេងជារៀងថ្ងៃ ដូចជាល្បែងបញ្ជល់មាន់ បៀ អាប៉ោង និងយូគី រហូតកើតមានអំពើហិង្សា ជាញឹកញាប់ រីឯលោក មេ ប៉ុស្តិ៍នគរបាលច្រកព្រំដែនក្អមសណ មិនហ៊ានប៉ះពាល់នោះទេ។
ទោះបីរាជរដ្ឋាភិបាលកម្ពុជាកន្លងមកណែនាំចូលរួមទប់ស្កាត់ឲ្យបិទល្បែងភ្នាល់ចាក់សុីសងខុសច្បាប់គ្រប់ប្រភេទ បែរម្ចាស់កាស៊ីណូថ្មពេជ្រ និងអាជ្ញាធរក្នុងមូលដ្ឋានព្រមទាំងសមត្ថកិច្ចស្រុកលេីកដែក បណ្តោយឲ្យមានល្បែងបញ្ជាល់មាន់ ក្នុងដែនដីរបស់ខ្លួនទៅវិញ។
គណៈកម្មការ គ្រប់គ្រងល្បែងពាណិជ្ជកម្ម បានលើកទៀតថា ក្នុងករណី ប្រតិបត្តិករ ឬកម្មសិទ្ធិកាស៊ីណូ មិនអនុវត្តតាមសេចក្តីណែនាំនោះ ត្រូវចាត់ទុកថា បានប្រព្រឹត្តល្មើសទៅនឹងច្បាប់ ស្តីពីការគ្រប់គ្រងល្បែងពាណិជ្ជកម្ម ដែលត្រូវប្រឈម នឹងការដាក់ទណ្ឌកម្ម រដ្ឋបាល និងពិន័យអន្តរការណ៍ ស្របតាមការកំណត់ដោយច្បាប់ និងលិខិតបទដ្ឋានគតិយុត្តជាធរមាន។
យ៉ាងណាក៏ដោយ ម្ចាស់ កាស៊ីណូថ្មពេជ្រ មិនបានយកចិត្តទុកដាក់ អនុវត្តន៍តាមគោលការណ៍ទេ ជាក់ស្តែងក្រុមអ្នកញៀនល្បែង ក្នុងកាស៊ីណូ ថ្មពេជ្រ បានបង្កហិង្សាដាក់គ្នា កាលពីថ្ងៃទី០៨ ខែតុលា ឆ្នាំ២០២៣ ដោយអនាធិបតេយ្យផ្តើមចេញពីជម្លោះ នៃការភ្នាល់ដាក់លុយ
តាមការបង្ហើបពីអ្នកធ្លាប់ចូលទៅលេង ក្នុងកាស៊ីណូថ្មពេជ្រ បានឲ្យដឹងថា ម្ចាស់កាស៊ីណូនេះ មានមន្ត្រីយោធាធំម្នាក់ នៅពីក្រោយខ្នង ទើបអាចបើកល្បែងបញ្ជល់មាន់ បៀ អាប៉ោង យូគី ហើយកៀងគរពលរដ្ឋខ្មែរ ឲ្យចូលលេងល្បែងយ៉ាងពពាក់ពពូន។
ប្រភពនេះបានបង្ហើបឲ្យដឹងថា មានការឃុបឃិតពីមន្ត្រីអាជ្ញាធរ និងសមត្ថកិច្ចពាក់ព័ន្ធក្នុងខេត្តកណ្តាលផងដែរ ទើបម្ចាស់កាស៊ីណូថ្មពេជ្រ ហ៊ានបើកឲ្យពលរដ្ឋខ្មែរ ចូលលេងល្បែងស៊ីសង យ៉ាងគំហុក ហើយម្ចាស់កាស៊ីណូ ប្រមូលលុយបានយ៉ាងច្រើនសន្ធឹកសន្ធាប់ក្នុងមួយថ្ងៃៗ។
ប្រជាពលរដ្ឋ រស់នៅ ភូមិក្អម ឃុំក្អមសំណ ស្រុកលេីកដែក អំពាវនាវ ឲ្យថ្នាក់ដឹកនាំក្រសួងមហាផ្ទៃ និងលោក គង់ សោភ័ណ្ឌ អភិបាលខេត្តកណ្តាល ព្រមទាំង លោក ឈឿន សុចិត្រ ស្នងការដ្ឋាននគរបាលខេត្តកណ្តាល មេត្តាចាត់មន្ត្រីក្រោមឱវាទ ត្រួតពិនិត្យភាពមិនប្រក្រត្រី ម្ចាស់កាស៊ីណូ ថ្មពេជ្រ និងបក្សពួកអ្នកញៀនល្បែង បញ្ជាល់មាន់ មានវិធានការបង្ក្រាប ជាបន្ទាន់ ដើម្បីបង្រឹងសន្តិសុខសង្គមសណ្ដាប់ធ្នាប់ ជូនពលរដ្ឋ ក្នុងមូលដ្ឋាន៕
